انا هنا..

انا موجود
و لسه ليا صوت
محدش سامعه حتى انا مش سامعه..
صوتي مدفون تحت كراكيب كتير جوايا بحاول ابعدها بس مبقاش ليا عزم ازيح بيه الم
و كسر
و عجز
و عفن
و احلام يآئسه
و نجاح موقوف
ومحاولات بوعد بيها نفسي كل يوم قبل ما انام (بكره الصبح هبدأ معايا من جديد)
وكل يوم بوعد نفسي علشان ادوس على وعد امبارح و اديني امل ادوس بيه على بكره و انا عارف اني مش هغير حاجه..
انا كبرت و عرفت اني مبقتش قادر اعمل اي حاجه.. زمان كنت فاكر اني لما هكبر هكسر سور العجز بس كبرت و عرفت ان كل يوم انا اللي ببني للسور طوبه جديده..
نفسي اخرج بره نفسي و اقولها كفايه..
كفايه تخاذل
كفايه سكوت
كفايه ضعف
كفايه انسحاب
و كفايه تسيب نفسك للتيار يجرفك لمكان مش بتاعك..
اصرخ بأعلى صوت
و ثور على انهزامك
و ضعفك
و انسحابك
و بطل تقول الظروف.
انا عارف ان لسه صوتي موجود..
اه.. انا بسمعه.. 
ايوه انا بسمعه لما الصخب اللي حوليا يسكت
انا بسمع انيني..
ايوه استغاثات من قبر حفرته جوايا ودفنتني فيه بسمعني بس بدوس عليه بوعد عارف اني مش هوفي بيه لما الصبح يجي..
انا عارف اني في يوم هموت
اه هموت زي اي حد هيموت
بس عاوز اموت مره واحده مش كل يوم